Co obxecto de ofertar novas actividades (obradoiros e contacontos), e facilitar o acceso da cidadanía á lectura, este verán as dúas bibliotecas municipais de Culleredo, a “Miguel González Garcés” do Burgo e a “Xosé Cardeso Liñares” de Vilaboa, permanecerán abertas ao público.

Neste ano 2012, o Concello de Culleredo investirá máis de 410.000 euros na axuda a persoas con dependencia a través do servizo de axuda no fogar. A axuda a domicilio pola vía da dependencia ven adxudicada pola Xunta pero a primeira tenente de alcalde, a nacionalista Raquel Jabares, explica que na actualidade a Xunta ten bloqueadas as altas en Culleredo.

O Concello desenvolverá mañá sábado 30 en Celas un curso básico de primeiros auxilios e actuación ante situacións de emerxencia para persoas que integran as comisións de festas do concello. A iniciativa ten como finalidade a preparación das persoas que organizan eventos de magnitude ante distintas situacións de emerxencia que se poidan presentar.

Os campos da Lavandeira do Burgo son sede desde o venres 29 de xuño ao domingo 1 de xullo do XIII Torneo de Fútbol 7 "A Ponte Pasaxe". Rapaces de once clubes das categorías prebenxamín, benxamín e alevín desfrutarán dunha festa do deporte.

O centro cívico de Castro-Laxe acollerá o venres 29 de xuño, desde as 21.00 horas, a final do Campionato de Tute Concello de Culleredo, que alcanza a súa XIII edición. Disputarana Catoira e José Antonio do Bar Algarabía contra Suso e Emilio, da asociación de veciños de Sésamo.

O Concello instalou arcones para a recollida do material en todos os colexios, institutos e escolas infantís públicas do municipio. O obxectivo: repartir material escolar novo ou en perfectas condicións ás familias en situación de emerxencia social. Na campaña aceptarase todo tipo de material escolar que se poida requirir no colexio, excepto libros de texto. Tamén se poderán achegar uniformes escolares, mochilas, chándales ou calzado deportivo.