O Concello de Culleredo estrea este sábado, 16 de xuño, a súa I Xuntanza Veciñal. Consistirá nunha xornada que combinará a degustación gastronómica de sardiñas cun Festival Folk que xuntará grupos de primeiro nivel como Os Cempés.

A Big Band do Conservatorio de Culleredo presentaranse ante o público no Concerto de Fin de Curso que terá lugar a partir das 19.30 horas do venres 15. A Big Band está orientada á música jazz e está composta por 17 artistas de 13 a 18 anos de idade e dirixida polo profesor Iván Doval.

O Concello organiza o sábado 16 de xuño, en Acea de Ama, a I Xuntanza Veciñal, un evento que reunirá opcións para todos os públicos, con 800 quilos de sardiñas e o Festival Folk que encabeza Os Cempés. Os prezos serán anticrise con racións de sardiñas e bebida por 2 euros e as cañas e refrescos a un euro.

O Conservatorio Municipal de Música de Culleredo emprende o proceso de inscrición no ensino dos graos elemental e profesional. O acceso ao primeiro curso de ambos graos conclúe este venres, 15 de xuño. O centro musical cullerdense permite cursar nas modalidades de acordeón, canto, clarinete, frauta, guitarra, percusión, piano, saxofón, trompeta, viola, violín e violoncello.

A Policía Local de Culleredo emprende unha campaña especial de vixilancia para velar que se cumpren todas as condicións de seguridade e comportamento cívico por parte dos propietarios de cans. Os axentes farán fincapé especialmente en dous aspectos: a recollida das deposicións e a seguridade.

O Concello recibiu unha furgoneta, con capacidade para 8 persoas, froito dun acordo cunha empresa, que a doa grazas ás achegas económicas obtidas de marcas que poñen publicidade na carruaxe. Será destinada a efectuar distintos servizos municipais, como o transporte de persoas con discapacidade. A furgoneta non lle custa nada ao Concello, que só terá que asumir os gastos de funcionamento.

O Concello de Culleredo aprobou a ordenanza reguladora da Inspección Técnica de Edificacións (ITE). Con esta medida, regúlase a obrigación de manter nas edificacións as condicións básicas de seguridade, estabilidade, estanqueidade, ou consolidación estrutural. Para iso, elaborarase un informe emitido por un técnico competente que se debe presentar dentro do ano seguinte a aquel en que o edificio cumpra 50 anos.