O Concello de Culleredo presenta a oferta de campamentos de verán 2013 e anuncia a apertura do prazo para a solicitude de praza. As actividades que se programan ofrecen unha alternativa de lecer para os nenos e nenas nos meses de verán, á vez que proporcionan un servizo de conciliación demandado cada ano polas familias dos pequenos. As solicitudes de praza, xunto coa documentación que se esixe, presentaranse no Servizo municipal de Educación (edificio do Conservatorio municipal de música) desde o día 15 ata o 19 de abril, en horario de 9:00 a 14:00 horas.

O Concello de Culleredo e a asociación ANHIDA Coruña organizan desde mañá unhas xornadas sobre a comunicación entre pais, nais e fillos e fillas acerca de educación sexual. Desenvolveranse os venres 12 e 19 de abril no Pazo de Villa Melania (Vilaboa) en horario de 18.30 a 20.00 horas. A actividade está aberta a toda a poboación de forma gratuíta.

As fortes choivas que están a caer permiten ao Concello de Culleredo comprar 40.283 metros cúbicos menos de auga a EMALCSA no primeiro trimestre do ano, con respecto a 2012. Esta baixada na compra supón un aforro para as arcas municipais de 11.531,22 euros que no que resta de ano podería chegar aos 50.000 euros. O alcalde apunta que a contía investirase en melloras na rede de augas.

O plan de formación do Concello de Culleredo recibe máis de 400 demandas dos veciños en situación de desemprego.  A asignación de prazas realizarase a través dunha proba de selección no caso de que o número de solicitudes supere ao de prazas, agás o taller de apoio á preparación das competencias clave que será por orde de inscrición. O vindeiro 24 de abril publicarase a lista no taboleiro de anuncios do Centro Municipal de Formación e na páxina web.

O Concello de Culleredo celebrou o Día Mundial da Auga centrando a atención sobre a importancia da auga doce e de avogar por unha Xestión Sustentable dos recursos hídricos. A Concellaría de Educación organizou o “I Concurso cartel-slogan :consumo responsable da auga" entre a poboación escolar. do que foi gañador  Diego Núñez Pereiro de 6º de Primaria do CEIP Sofía Casanova. A aula gañadora que foi a de 6º B.

O Concello de Culleredo celebra o vindeiro sábado, 13 de abril, a XVIII edición do Certame de Canto Coral. Nesta ocasión, a cita servirá ademais para conmemorar o XX aniversario da Coral Fonte do Souto, natural do municipio. O certame terá lugar desde as 19.30 horas na igrexa parroquial de Culleredo, sita en Tarrío.