ES / GL

Cullerciencia celebra o sábado 6 a súa oitava edición con maior horario e 34 postos de experimentos e divulgación científica

2 Xuño, 2026. 13:55

Educación

O Concello de Culleredo e o CEIP Ría do Burgo organizan a oitava edición de Cullerciencia, unha feira xa consolidada en Galicia e que reúne cada ano a centos de visitantes. Será o vindeiro sábado, 6 de xuño, no paseo marítimo do Burgo, e nesta ocasión chega cun horario ampliado, de 12:00 a 20:00 horas, para propiciar que os visitantes gocen de todos os proxectos.

A feira científica escolar promete ser unha xornada chea de experimentos, proxectos creativos e actividades interactivas para toda a familia. Este ano haberá un total de 34 postos, con entidades como colexios, institutos, centros de investigación, facultades, fundacións e asociacións, cada unha delas coa súa propia proposta baseada nos traballos e investigacións científicas realizadas.

Os grandes protagonistas serán os centros escolares, destacando non só a presenza dos centros do municipio, senón tamén doutros chegados desde concellos como Oleiros, Cambre, A Coruña, Vigo e As Pontes, aínda que chegarán visitantes de moitos outros puntos.

Así mesmo, na feira poñerase en marcha un carné que certificará a visita aos diferentes postos. Quen o complete levará un agasallo. No inicio non faltará a música, coa actuación da Agrupación Folclórica Ancoradoira na explanada.

O CEIP Ría do Burgo volcarase para difundir a cita, realizando retransmisións en streaming a través da súa canle na plataforma Twitch e na radio escolar.