ES / GL

O Concello de Culleredo ofrecerá en Vilaboa o novo servizo de atención temperá

16 Xaneiro, 2026. 13:52

Benestar Social

As familias de Culleredo estrearán nova prestación social nas próximas semanas. O Concello poñerá en marcha o servizo de atención temperá, que se dirixe á poboación infantil de 0 a 6 anos co obxectivo de dar resposta ás necesidades, xa sexa transitorias ou permanentes, que presenten os usuarios con trastornos de desenvolvemento ou con risco de padecelos.

A prestación ofrecerase en Vilaboa, no local municipal situado na rúa Domingo Sierra, xunto á oficina do departamento de Servizos Sociais. O Concello realizará a atención temperá a través da entidade social COGAMI, que xa conta coa experiencia previa noutros municipios da contorna.

O proxecto presentado polo goberno municipal logrou os fondos europeos no marco do programa FSE+ Galicia 2021-2027, que concede a Consellería de Política Social para poñer en marcha a iniciativa e integrala na rede autonómica. En concreto, o Concello obtivo 108.771,56 euros para que a unidade bote a andar.

A atención temperá do Concello de Culleredo empezará a funcionar nas próximas semanas. Os usuarios accederán derivados principalmente dos servizos sociais atendendo ás necesidades que informen os técnicos.

A iniciativa contará con servizos individualizados de logopedia, terapia ocupacional ou psicoloxía. Ofrécense nun momento clave para o desenvolvemento psicomotriz da infancia, potenciando as súas capacidades e procurando a integración na súa contorna.