ES / GL

O Concello abre un servizo de información turística

22 Agosto, 2017. 16:42

Turismo

O Concello de Culleredo ofrece xa información turística aos seus visitantes. Grazas ao cofinanciamento da Deputación da Coruña, o goberno local contratou a un técnico de turismo, reabrindo a oficina municipal de información sita no Burgo, xunto á ponte sobre a ría.

Os turistas poderán recibir información dos puntos de maior interese para visitar, as zonas de hostalaría, o percorrido do Camiño de Santiago, as rutas de sendeirismo ou as conexións con outros núcleos da comarca.

A Oficina de Turismo estará aberta de martes a venres, de 17.30 a 20.00 horas, e os sábados de 17.00 a 20.00 horas. Polas mañás, poderase recibir información turística no Centro Municipal Pablo Picasso.

O alcalde en funcións, José Ramón Rioboo, e o concelleiro de Desenvolvemento Socioeconómico, Juan Carlos Lovelle, foron os primeiros usuarios da Oficina de Turismo. "Culleredo ten moitas opcións de turismo, vinculado á natureza ou ao patrimonio, válido para calquera época do ano", apuntou Rioboo.

Na Oficina, o visitante pode obter un mapa de Culleredo cos principais lugares destacados. A dependencia está situada a pé do Camiño Inglés, outro dos reclamos turísticos do municipio.

Con motivo da contratación deste técnico de turismo, ata decembro, o Concello acometerá pequenos traballos de mellora desta caseta, que permanecía en desuso. Nos próximos días mellorarase o acceso e encargarase unha decoración exterior para facer fronte ás pintadas.

A atención turística de Culleredo ofrecerase en catro idiomas: galego, español, inglés e italiano. Tamén se pode chamar por teléfono no mesmo horario de apertura ao 680 266 040.