O futuro instituto de Educación Secundaria de Culleredo contará con amplas instalacións para dar resposta ás necesidades da comunidade educativa. O proxecto recentemente realizado da infraestrutura propón unha distribución en tres plantas máis un soto para dar a cabida a todos os espazos de docencia e administrativos que se requiren.

A planta baixa dedicarase eminentemente aos servizos administrativos e de xestión. Albergará a secretaría do centro, a sala de profesores, a reprografía, e os despachos para a dirección, xefatura de estudos, ANPA, alumnos e orientación educativa. Neste piso tamén se emprazan dous laboratorios e dúas aulas para impartir Tecnoloxía.

A primeira planta destínase á docencia de materias específicas. Así, contará con dúas aulas de informática, dúas aulas de música e dramatización, dúas aulas de debuxo e tres aulas para o desdobre de grupos. Tamén se situarán aquí equipamentos como a biblioteca, un amplo espazo polivalente, nove seminarios, a cociña e a cafetaría.

A planta segunda será a que acolla as 16 aulas de docencia xeral, catro por cada curso. No soto emprazarase o ximnasio cos seus vestiarios.

Os servizos deportivos do IES serán amplos. No exterior construirase un polideportivo cuberto, con varios accesos, e pistas deportivas descubertas.

O aspecto exterior do centro gardará relación co estilo da Universidade Laboral, ao emprazarse nos devanditos terreos, na avenida de Rutis. O acceso ao instituto realizarase pola mesma porta de acceso ao recinto, cun camiño propio.

O goberno de Culleredo confía en que a licitación dos traballos de construción sexa lanzada pola Xunta de forma inminente para que a adxudicación póidase producir no primeiro trimestre de 2014, sobre o mes de marzo.

Desta forma, a apertura do instituto podería producirse para o curso 2015-2016. Aínda que o desexo do goberno municipal era que o centro de ensino puidese xa funcionar no 2014-2015, os últimos pasos dados pola Xunta foron importantes para que terminar coa espera e poder facer realidade un espazo ansiado por Concello e comunidade educativa.

O equipo de goberno espera que a consignación que figura nos orzamentos autonómicos para 2014 sexa superior ao longo do exercicio, coa incorporación de remanentes procedentes do actual exercicio, e así garantir a "maior celeridade" na tramitación e construción do IES.