O Concello de Culleredo ten aberto o proceso dos Orzamentos Participativos 2026, unha ferramenta de participación cidadá que permite á veciñanza e ás entidades locais propoñer investimentos de interese xeral para incluír nos próximos orzamentos municipais.

As persoas interesadas poderán enviar as súas achegas durante todo o mes de setembro a través do correo electrónico participa@culleredo.es ou mediante o Rexistro Municipal.

As propostas deben recoller:

• Nome e apelidos da persoa proponente.

• Asociación que representa (de ser o caso).

• Título e descrición da proposta.

Só se admitirán aquelas iniciativas que sexan viables e teñan vocación de interese xeral.

Quen pode participar

Segundo o Regulamento Orgánico de Participación Cidadá do Concello de Culleredo, poderán tomar parte:

• Persoas físicas: maiores de 18 anos, empadroadas en Culleredo a 31 de decembro de 2024.

• Asociacións e entidades: inscritas debidamente no Rexistro Municipal de Asociacións.

Asesoramento técnico

O persoal técnico municipal analizará as propostas recibidas, informará sobre a súa viabilidade e asesorará no proceso. As achegas cidadás poderán supoñer ata un 25% dos investimentos municipais.

O Concello anima a toda a veciñanza a participar activamente nesta iniciativa, co obxectivo de seguir construíndo un Culleredo máis participativo e adaptado ás necesidades reais da cidadanía.