O Concello de Culleredo gozará durante varias semanas de torneos de fútbol, desde o sábado 9 de agosto ata o vindeiro domingo 31 de agosto. Haberá catro categorías diferentes que permitirán que os distintos equipos do municipio poidan participar, divididos entre afeccionados, veteranos, fútbol base e fútbol feminino.

 

O primeiro en disputarse será o XLVI Trofeo de Fútbol Afeccionado, no que participarán sete equipos diferentes (Olímpico de Rutis A, Olímpico de Rutis B, Sporting Burgo A, Sporting Burgo B, U.D.J Almeiras, A.D. Culleredo e Portazgo S.D.). Disputarán partidos por grupos ata o mércores 27 de agosto, dos que sairán os dous conxuntos que xogarán a final, programada para o sábado 30 de agosto no campo de Almeiras.

 

Posteriormente será a quenda do XXVI Trofeo de Fútbol Veteranos, no que participarán outros sete equipos (Olímpico de Rutis A, Olímpico de Rutis B, Sporting Burgo, SPM, U.D.J. Almeiras, Portazgo S.D. e Fontemayor) e que contará cun sistema similar. Empezará o vindeiro luns 18 de agosto e prolongarase até o sábado 30 de agosto, data na que se xogará a final en Almeiras. 

 

Nas xornadas do 23 e 30 de agosto disputarase o XI Trofeo de Fútbol Base, onde participarán nenos en categoría cadete de seis equipos diferentes (Olímpico de Rutis A e B, A.D.Culleredo, Sporting Burgo, Portazgo S.D. e U.D.J. Almeiras). Todos os encontros disputaranse no campo de Almeiras e, aínda que o sistema é o mesmo que nos torneos anteriores, neste haberá final e partido polo terceiro e cuarto posto, ambos o 30 de agosto.

 

Para pechar as semanas de fútbol, Culleredo acollerá o VII Trofeo de Fútbol Feminino, que se disputará integramente na xornada do 31 de agosto tamén no campo de fútbol dos Loureiros. O formato neste caso é diferente, con tres equipos participantes (Olímpico de Rutis, A.D. Culleredo e Sporting Burgo) que disputarán un triangular.

 

A primeira tenente de alcalde e concelleira de Deportes, Cristina Pardo, destaca que os torneos de Culleredo son dos máis lonxevos da comarca, levantando cada verán moita expectación. "Son unha oportunidade formidable para a competición sa e convivencia entre os clubs cullerdenses e queremos seguilos potenciando", indica.