O auditorio do Edificio de Servizos Múltiples do Burgo acollerá o vindeiro venres 25 de setembro, ás 20:30 horas, o espectáculo “Mofa e Befa: Os dous de sempre”, de Producións Teatrais Excéntricas.

A peza, dirixida por Quico Cadaval, é unha adaptación da recoñecida novela de Castelao. Sobre o escenario estarán “os dous de sempre”, Evaristo Calvo e Víctor Mosqueira, é dicir, Mofa e Befa, que contarán coa compañía de Josito Porto.

O espectáculo ten unha duración aproximada de 99 minutos e está recomendado para público a partir de 15 anos. A entrada é de balde, aínda que é preciso reservar previamente no teléfono 981 665 597 ou no propio Edificio de Servizos Múltiples, en horario de 9:00 a 14:00 horas.

A obra forma parte da programación cultural que o Concello de Culleredo desenvolve grazas á colaboración da Deputación da Coruña, a través da Rede Cultural.