Os veciños e veciñas de Culleredo que queiran organizar unha lumarada, sardiñada ou churrascada na noite de San Xoán poden comunicalo ao Concello ata o vindeiro 20 de xuño. O alcalde, José Ramón Rioboo, fixo público un bando no que regula diversos aspectos do desenvolvemento das tradicionais cacharelas.

 

As comunicacións poden enviarse ao Concello por escrito ou a través do correo electrónico sanxoan@culleredo.es. Nelas deben especificarse os datos da persoa responsable (DNI, enderezo e teléfono de contacto) e concretarse a localización exacta da parcela ou soar onde se celebrará, ben mediante un plano ou dunha referencia catastral.

 

O horario para gozar das lumaradas establécese a partir das 18:00 horas do día 23 de xuño ata as 3:30 horas do día 24. Mentres permanezan acesas deberán cumprirse determinadas normas de seguridade. Queda prohibido prender cacharelas en zonas verdes e parques infantís, así como nun perímetro de 15 metros ao seu redor, e tampouco poderán realizarse xunto a colectores, vehículos ou vivendas sen gardar esa separación mínima de 15 metros. O uso de combustibles con acelerantes queda igualmente prohibido e será necesario protexer o chan con area ou materiais similares.

 

No que respecta ás sardiñadas e churrascadas, non poderán ocupar calzadas nin entorpecer a circulación de vehículos. Deberán contar con illamento térmico e con extintor ou sistema similar e, unha vez rematada a celebración, as persoas responsables quedan obrigadas a deixar o espazo nas mesmas condicións nas que o atoparon.

 

A Policía Local e Protección Civil velarán polo cumprimento destas normas durante toda a noite e poderán retirar de forma inmediata materiais ou instalacións que supoñan un risco para a seguridade. Así mesmo, poderán inspeccionar as cacharelas e determinar, se é o caso, a altura máxima que deberán respectar.

 

Desde o Concello agradecen de antemán a colaboración de todos os veciños e veciñas de Culleredo, así como a dos visitantes que acudan ao municipio para celebrar as festas de San Xoán.