O Concello de Culleredo, a través do Centro de Información e Participación Xuvenil (CIPAX), pon en marcha a segunda edición do seu concurso de booktrailers, unha iniciativa que combina literatura, cinema e creatividade co gallo do Día das Letras Galegas 2026.

 

A proposta está dirixida á mocidade de entre 13 e 29 anos, que poderá participar de forma individual ou en grupo, coa finalidade de reinterpretar obras da literatura galega mediante pezas audiovisuais breves. O obxectivo é fomentar a lectura, a expresión creativa e a alfabetización mediática, adaptando os relatos literarios aos códigos visuais contemporáneos.

 

Un booktrailer é unha pequena peza audiovisual que transmite o espírito dunha obra literaria, do mesmo xeito que un tráiler de cine. Non se trata de contar toda a historia, senón de capturar a súa atmosfera, o seu ton ou unha idea clave. As propostas poden adoptar múltiples formas: desde curtametraxes con actores e actrices ata animacións, colaxes visuais ou vídeos de carácter máis conceptual ou poético.

 

Desde a organización sublíñase que non é necesario contar con medios profesionais: “Abonda cun móbil, unha boa idea e ganas de contar algo”, destacando así o carácter accesible e aberto do certame.

 

Os traballos deberán ter unha duración de entre 30 segundos e 2 minutos, estar realizados en galego e basearse en obras escritas na nosa lingua. A técnica é libre, podendo combinar diferentes formatos e recursos, incluíndo animación, stop-motion ou incluso contidos xerados con intelixencia artificial.

 

O prazo de presentación estará aberto ata o venres 8 de maio de 2026. As propostas deberán enviarse mediante unha ligazón ao vídeo ao correo habilitado pola organización.

 

Toda a información detallada sobre as bases, requisitos e documentación necesaria pode consultarse na web oficial do certame: www.booktrailerculleredo.com.

 

O certame repartirá premios de ata 300 euros en material cultural ou tecnolóxico, ademais de vales para libros noutras propostas destacadas. O fallo do xurado darase a coñecer o 17 de maio, coincidindo coa celebración do Día das Letras Galegas.

 

Con esta iniciativa, o Concello de Culleredo reafirma o seu compromiso coa promoción da cultura galega e coa creación de espazos nos que a mocidade poida explorar novas formas de expresión, conectando a tradición literaria coas linguaxes audiovisuais do presente.