Culleredo celebrará o Día do Libro cunha programación cultural dirixida a todos os públicos. O Concello organiza un concerto-conferencia sobre mitoloxía clásica e unha sesión de contacontos infantil a cargo da Dragona Ramona para conmemorar unha das datas máis sinaladas da literatura.

 

A actividade principal terá lugar o xoves 23, Día do Libro, co concerto-conferencia ‘A música dos deuses’, que se centrará no mundo clásico como fonte inesgotable de inspiración musical. Ao longo da sesión explicaranse algúns dos mitos máis relevantes da tradición clásica, combinando divulgación e música en directo.

 

A proposta contará coa participación de Concepción Pazos e a soprano Susana de Lorenzo, quen interpretará varias pezas en directo mentres se proxectan contidos audiovisuais relacionados con esta mitoloxía, ofrecendo unha experiencia cultural que combina relato, imaxe e son. A actividade terá lugar na Biblioteca Xosé Cardeso Liñares (Vila Melania, Vilaboa) ás 19:00 horas, con entrada libre ata completar aforo.

 

A programación continuará o venres 24 cunha actividade dirixida ao público infantil. Ás 17:30 horas, tamén na biblioteca de Vila Melania, a Dragona Ramona protagonizará unha sesión de contacontos dirixida a nenos e nenas a partir de 3 anos. A actividade será tamén de entrada libre.

 

Con estas propostas, o Concello de Culleredo busca fomentar a lectura entre a veciñanza e achegar a cultura a todos os públicos con actividades accesibles e entretidas.