ES / GL

Cine, charlas e contacontos protagonizan unha semana marcada pola cultura en Culleredo

24 Marzo, 2026. 11:57

Cultura

A cultura volve protagonizar a semana en Culleredo. O Concello elabora unha axenda marcada polas actividades culturais, con cine, charlas e contacontos para entreter e concienciar á cidadanía, dentro do programa do 8M e tamén da aposta municipal por fomentar a igualdade e promover a cultura.

Na mañá deste martes estaba programada a primeira quenda das charlas “Mulleres de Culleredo que fan historia”, co alumnado do CEIP Sofía Casanova como público. A conferencia aborda a vida de diferentes mulleres do municipio que acabaron nas páxinas da historia, como é o caso da propia Casanova, destacada correspondente no estranxeiro.

A charla ofrecerase mañá, mércores 25, aberta ao público na Biblioteca Municipal do Burgo ás 17:30 horas. Ambas citas están enmarcadas na programación do Concello con motivo do 8M.

Tamén dentro dos actos do Mes da Muller, o xoves proxectarase o documental “Hijas de Cynisca”. A película aborda unha das discriminacións máis persistentes da nosa sociedade: a do ámbito deportivo, onde as mulleres seguen atopando obstáculos constantes que dificultan o seu progreso. A sesión comezará ás 17:50 horas no Auditorio do Edificio de Servizos Múltiples e a entrada será libre.

Por outra banda, os contacontos regresan o venres da man da Dragona Ramona, que relatará a historia “A pequena osa quere xogar”. Neste caso, a actividade comezará ás 17:30 horas na Biblioteca Cardeso Liñares de Vilaboa e está dirixida a nenos e nenas maiores de tres anos.