ES / GL

A Asociación de Veciños de Castro Laxe organiza a xornada solidaria 'Todos con Carmiña'

9 Marzo, 2026. 13:05

Alcaldía

A Asociación de Veciños de Castro Laxe organiza, coa colaboración do músico local Abel Franqueira e do Concello de Culleredo, a xornada solidaria ‘Todos con Carmiña’ o vindeiro 21 de marzo. O evento busca recadar fondos para reconstruír a vivenda de Carmen, veciña de Castro Laxe que perdeu o seu fogar nun incendio o pasado 26 de febreiro.

O programa benéfico comezará ás 10:30 horas cunha andaina, á que seguirá a actuación de Os da Veira do Monte. De 12:00 a 16:30 horas, o acento musical porano Abel e amigos. A solidariedade retumbará despois en Castro Laxe cunha ruta moteira ás 16:00 horas.

O teatro tomará o relevo ás 16:30 horas, antes de que arrinquen os concertos ás 19:00 horas coa música en directo de Gremlins, Banda del Camión, Hemacaos e Juego Sucio. Sonora Balkumbiera exercerá de DJ e, para completar a axenda, haberá un mercado benéfico, comida e sorteos.

A xornada terá lugar na cancha cuberta de Castro Laxe, e terá unha entrada solidaria de 10€. Os nenos poderán acceder de xeito gratuíto. O Concello convida a toda a cidadanía a asistir a esta iniciativa e contribuír coa reconstrución da casa da nosa veciña.