ES / GL

Culleredo entrega os premios á decoración do Nadal do comercio e da hostalería local

21 Xaneiro, 2026. 17:04

Promoción Económica

O Concello de Culleredo fixo entrega dos premios á mellor decoración do Nadal en comercios e establecementos hostaleiros do municipio, uns galardóns que este ano recoñeceron a Tania Louro Peluquería e a Café Bar Toxo Bravo como gañadores do VI Concurso de Escaparatismo de Nadal e do II Concurso de Ambientación de Nadal na Hostalería Local, respectivamente.

No concurso de escaparatismo participaron un total de 79 establecementos, sendo os tres mellor valorados, segundo a media entre os votos do público e a puntuación dun xurado profesional, Tania Louro Peluquería, Farmacia Ortopedia Almeiras e Farmacia Grandal. Os premios consistiron en 500 euros para o primeiro clasificado, 300 euros para o segundo e 200 euros para o terceiro.

Pola súa banda, o concurso de ambientación do Nadal en hostalería contou coa participación de 23 negocios. Os tres locais mellor valorados foron Café Bar Toxo Bravo, El Sazón de Fina e A Penúltima, que recibiron premios en metálico de 300, 200 e 150 euros, respectivamente.

A tenente de alcalde, Cristina Pardo, e o concelleiro de Comercio, Mario Iglesias, foron os encargados de entregar os premios, desprazándose persoalmente a cada un dos establecementos galardoados para felicitarlles polo seu traballo e dedicación.

Ambos concursos rexistraron unha alta participación cidadá, con preto de 3.500 votos, o que pon de manifesto o éxito destas iniciativas, incluídas dentro da campaña de Nadal do Concello de Culleredo, cuxo obxectivo é dinamizar o comercio local e incentivar as compras nos negocios do municipio.

ACCESO A TODAS LAS FOTOGRAFÍAS DE LOS ESTABLECIMIENTOS PARTICIPANTES EN:

www.omellorescaparatedeculleredo.com

www.hostaleriadenadalenculleredo.com