O alcalde de Culleredo, José Ramón Rioboo, recibiu na Casa do Concello aos representantes da nova asociación O Val de Culleredo, Óscar Andrade e Marcos Martínez. O encontro serviu como presentación da entidade, que nace, explicaron, coa intención de converterse en nexo de unión para as diferentes parroquias que concorren no val, promovendo actividades e melloras na zona.

 

Rioboo felicitou aos veciños pola iniciativa e mostrou o seu total compromiso a traballar en conxunto para o avance do val. Os responsables da asociación expuxeron na reunión diversas propostas de investimentos que serán analizadas polo Concello. Será o caso da creación dunha senda fluvial xunto ao río Valiñas, para poñer en valor unha contorna natural única, ou o arranxo da estrada desde Rumbo ata a zona do novo colexio.

 

Ademais contan con reivindicacións para rede de estradas da Xunta. A entidade reclama a construción de beirarrúas ou sendas na AC-400 desde Sésamo a Celas, unha petición moi repetida. Tamén piden sendas desde Ledoño á AC-400 e un cambio na sinalización da nova rotonda, onde a AXI non puxo “Sésamo”.

 

Outra acción que defende dado que preocupa aos veciños é a eliminación dos posibles asentamentos ilegais en parcelas rústicas. Tamén apostan pola eliminación dos cables aéreos para mellorar a estética e garantir a seguridade e o servizo.

 

En canto a actividades, O Val de Culleredo traballa actividades ao aire libre para os pequenos e propón un plan conxunto para concienciar e evitar que persoas depositen residuos no val en lugar de empregar os puntos limpos.

 

En canto ao seu día a día, a entidade tamén suxeriu a obtención dun espazo para poder desenvolver as súas actividades.