O Concello de Culleredo incorpora a tres novos policías locais tras efectuar o proceso selectivo para a provisión das prazas, de acceso libre, incluídas na súa Oferta Pública de Emprego. Os axentes son nomeados funcionarios en prácticas dado que desde xaneiro realizarán a súa formación por seis meses na Academia Galega de Seguridade Pública e posteriormente desenvolverán as súas prácticas na Policía Local durante outros tres meses máis para finalmente converterse en funcionarios de carreira.

 

O alcalde, José Ramón Rioboo, asinou o nomeamento nun acto ao que acudiron os tres novos axentes. Tamén asistiu a concelleira de Recursos Humanos e Réxime Interior, Marta Figueroa, e o responsable da Policía Local de Culleredo, Fernando Vázquez. 

 

Rioboo felicitou aos axentes por superar o proceso e desexoulles un proceso formativo proveitoso para a súa posterior entrada ao posto.

 

Este incremento do persoal da Policía Local por parte do goberno municipal non queda nesta acción. O Concello incorporou o ano pasado a 4 axentes máis e completou outras 3 de promoción interna para oficial.

 

Este proceso de selección foi realizado a través da Xunta, mediante o convenio subscrito co Concello de Culleredo. A formación teórica comprenderá 900 horas e as prácticas, 500.