O Concello de Culleredo volverá participar no Festival Internacional Galicreques, organizado pola Asociación Cultural Barriga Verde. Nesta ocasión, o municipio acollerá ata tres espectáculos na que será a trixésima edición do evento. As funcións, con entrada libre e gratuíta ata completar aforo, terán lugar en diferentes espazos municipais e están dirixidas a todos os públicos, con especial atención ao público infantil e familiar. 

 

A primeira cita chega da man da compañía chilena Monicreques Candelilla, que actuará este venres, 17 de outubro, ás 19:30 horas no Auditorio do Edificio de Servizos Múltiples do Burgo. Presentarán a obra ‘Kuiyen, sueño mapuche’, unha historia que nos achega á cultura do pobo mapuche a través de Kuiyen, unha moza que se prepara para celebrar o Wiñol Tripantu, a renovación da terra. 

 

Durante os preparativos, coñecerá a Manque, o cóndor, e xuntos deberán enfrontarse a Puelche, o vento, que tenta impedir que continúen coas súas tradicións. A obra está recomendada para nenas e nenos a partir de 2 anos e ten unha duración aproximada de 45 minutos. 

 

 

O festival continuará o venres 24 de outubro, tamén ás 19:30 horas e no mesmo auditorio, coa representación de ‘Verán na lavandería’, a cargo das compañías coruñesas K’Paparota e Danthea Teatro. 

 

Por último, o venres 31 de outubro, a compañía Teatro Escena levará ao Centro Social e Cultural de Celas a divertida obra ‘Buh! Que medo!’, programada a partir das 19:00 horas dentro das actividades organizadas con motivo da festa do Samaín.