O Concello de Culleredo organiza este domingo, 5 de outubro, a primeira edición do Día da Bicicleta, unha gran festa deportiva aberta a veciños e veciñas de todas as idades. A cita desenvolverase no emblemático Paseo Marítimo do Burgo, un dos espazos máis concorridos polos afeccionados ao deporte no municipio. O evento está promovido por La Voz de Galicia e Radio Voz, e conta co patrocinio de Vegalsa, Eroski e Familia. 

 

A xornada arrincará ás 12:00 horas, con saída desde a explanada situada xunto á ponte do Burgo. As inscricións poderanse realizar no propio punto de saída desde unha hora antes, a partir das 11:00 horas. O Concello lembra que será obrigatorio o uso de casco para participar na marcha ciclista, cuxo percorrido discorrerá integramente polo paseo marítimo. 

 

A partir das 13:00 horas celebrarase un sorteo de agasallos entre todas as persoas participantes. Os premios incluirán unha bicicleta, experiencias gastronómicas e outros obsequios, como un smartwatch, uns auriculares, unha cafeteira italiana, unhas lentes deportivas ou equipamentos deportivos. Para pechar a xornada, ás 13:30 horas, terá lugar unha exhibición de zumba aberta a todo o público asistente. 

 

Co fin de que a xornada transcorra con total normalidade, o dispositivo de seguridade contará coa colaboración de Protección Civil, Policía Local e Garda Civil.