O Concello de Culleredo estrea neste 2025 a súa nova sede electrónica, na que as persoas físicas e as empresas poden facer trámites de forma dixital sen necesidade de acudir de xeito presencial ao Concello. Pódese acceder a esta nova sede na dirección  sede.culleredo.es, onde xa están habilitados máis de 30 procedementos. Ao longo do ano a cifra de procedementos irase incrementando con máis posibilidades.

Os cidadáns poderán realizar trámites aínda que non conten co certificado dixital, para o que se utilizará un correo electrónico con usuario e contrasinal. Nestes casos, as solicitudes teranse que asinar posteriormente, nun prazo de 10 días, nas oficinas municipais de rexistro.

Esta nova sede enmárcase dentro do Programa Estratéxico de Implementación da Administración Electrónica no Concello de Culleredo 2024-2027, aprobado pola Xunta de Goberno Local. Este mesmo plan tamén contempla a nivel interno a posta en marcha dun novo xestor de expedientes plenamente interoperable con plataformas doutras administracións públicas, o que facilitará a tramitación administrativa, simplificando a xestión e reducindo as cargas ao cidadán.

Todos os interesados en coñecer o seu funcionamento poden consultar os diferentes titoriais dispoñibles na canle de YouTube do Concello de Culleredo. Nos vídeos dispoñibles explícanse, por exemplo, as seguintes cuestións:

• Como funciona a sede electrónica?
• Como se pode realizar un trámite na nova sede electrónica?