O Concello de Culleredo avanza na renovación dos servizos de administración electrónica para facilitar as xestións á cidadanía. O próximo 1 de xaneiro de 2025, o goberno municipal pon en marcha a nova sede electrónica na que se poderán realizar trámites de forma integramente dixital por parte de persoas físicas e empresas sen necesidade de acudir presencialmente ao Concello.

 

A nova sede, á que se accederá na dirección sede.culleredo.es, arrincará con máis de 30 procedementos habilitados. A previsión consiste en que ao longo do ano esta cifra se vaia incrementando con máis posibilidades.

 

Unha das características da nova sede é que os cidadáns poderán mesmo realizar trámites aínda que non dispoñan de certificado dixital, utilizando un correo electrónico con usuario e contrasinal. As solicitudes desta forma teranse que asinar posteriormente, nun prazo de 10 días, nas oficinas municipais de rexistro.

 

O desenvolvemento da sede enmárcase no Programa Estratéxico de Implementación da Administración Electrónica no Concello de Culleredo 2024-2027, que foi aprobado pola Xunta de Goberno Local. Este plan contempla tamén, a nivel interno, a posta en marcha dun novo xestor de expedientes plenamente interoperable con plataformas doutras administracións públicas, o que facilitará a tramitación administrativa simplificando a xestión e reducindo as cargas ao cidadán.

 

Ademais, a nivel externo, o Concello impulsará un novo modelo de atención cidadá multicanal, que potenciará o uso das novas tecnoloxías e mellorará a atención telefónica e presencial nas distintas dependencias municipais, con novos puntos de rexistro de documentos nos principais servizos que evitarán desprazamentos aos cidadáns. 

 

O goberno local avanza que tamén se configurará ao longo do ano 2025 o actual punto de rexistro do Edificio de Servizos Múltiples do Burgo como unha Oficina de Atención Integral ao Cidadán. Será un espazo onde se poderá informar e asistir ao veciño, facilitándolle a realización de calquera trámite sen necesidade de acudir a outras dependencias do Concello.