O Concello dá continuidade ao programa de formación en arbitraxe para a mocidade co colexiado Diego Seoane, que pita en Preferente a nivel autonómico. A Administración local e o Comité Técnico Gallego de Árbitros de Fútbol xa iniciaran en febreiro de 2023 o proxecto pioneiro para promover esta vertente do deporte entre o alumnado do IES Blanco Amor de Culleredo, que tivo continuidade esta mañá no propio centro. Sumarase nesta edición o Rego de Trabe.

Unha trintena de escolares puideron así entrar en materia, equipados xa con tarxetas, chifre e vestiario profesional, que se lles regalou antes de comezar a sesión, para posteriormente traballar sobre o terreo.

Esta Escola de Arbitraxe, de mans do Comité Técnico, inclúe a arbitraxe dos mozos e mozas na propia liga escolar. Esta iniciativa non se realizou nunca en España. Con esta proposta búscase animar á rapazada, que verán o seu labor reflectido en partidos cos seus propios compañeiros.