O Concello de Culleredo prosegue coas tarefas de remodelación da rede de beirarrúas municipal, co obxectivo de aumentar a mobilidade peonil e facer as súas rúas accesibles para todas e todos.

Os operarios actúan nestes momentos tanto no tramo situado fronte á polideportiva de Fonte da Balsa, na confluencia entre a Avenida de Vilaboa e a rúa García Lorca, como na Avenida Acea de Ama, unha das vías con máis concorrencia peonil e de tráfico de todo o municipio.

Desde o departamento de Obras e Servizos anuncian o inmediato comezo tamén de varios asfaltados, como o das rúas Cruces ou As Reixas. “A nosa intención é dotar a Culleredo das mellores infraestruturas, e iso pasa pola remodelación de tramos de beirarrúas e estradas deteriorados, xa sexa no ámbito rural ou urbano”, insisten.