Un total de 320 nenas e nenos gozaron desde o pasado 27 de xuño do programa Mañás de campamento, impulsado polo Concello e co que se buscaba facilitar a conciliación, así como a dinamización dos espazos formativos para aprender dunha maneira sa nun período non lectivo como o é o verán.

Jéssica Méndez, edila de Educación, visitou aos nenos e nenas no CEIP Vila de Rutis e o CEIP Sofía Casanova para desexarlles un “feliz comezo de curso”. As actividades estiveron deseñadas para gozar ao aire libre de xogos, promovendo a convivencia e as relacións e interaccións sociais entre as nenas e nenos, e adaptadas ás diferentes idades, cun enfoque activo e participativo, e unidas mediante un fío condutor.

A ciencia, a historia, a música, as artes plásticas e a natureza son as diferentes temáticas que se abordan nos talleres que levan a cabo. Socializar e desenvolver, valores de tolerancia, traballo en equipo, integración, respecto cara aos demais e á súa contorna, foron os obxectivos transversais deste programa.

“O balance é moi positivo, cun gran número de nenas e nenos rexistrados e rexistradas, pero ademais tremendamente contentos e contentas por como se desenvolveu este Mañás de campamento, o primeiro que gozou de certa “normalidade” tras a pandemia”, declarou Méndez, concelleira de Educación.