O Concello de Culleredo adxudica novas actuacións dentro dos seus plans de mellora da rede viaria do municipio. Nesta ocasión acaba de contratar as obras para renovar viarias de Vinseira Pequena e de Castelo, respondendo as demandas dos residentes da súa contorna.

O goberno local investirá 66.188 euros nas dúas intervencións. A renovación do vial VP-357 en Vinseira Pequena adxudícase en 30.978 euros mentres que no caso do vial VP-494, en Castelo, a contía alcanza os 35.210 euros.

Os traballos consisten na mellora do seu acabado estrutural e drenaxe, coa consecuente optimización da seguridade viaria. O firme será renovado, cun rebacheado nas zonas máis deterioradas, e a disposición dunha nova capa de rodadura en toda a superficie. Finalmente levará a cabo a correspondente sinalización horizontal e vertical.

Ambas as vías funcionan como acceso a zonas residenciais. No caso de Vinseira Pequena, a estrada que se renovará, de 0,5 quilómetros, conecta as vivendas coa AC-400. E no caso de Castelo, a vía une a estrada provincial coa contorna de Villaverde, con 0,3 quilómetros.