Finita Gay xa forma parte do patrimonio inmaterial de Culleredo coa súa homenaxe no Castelo Conta, que tivo lugar onte, martes 23 de agosto, con inauguración do mural conmemorativo á súa figura, que como muller da época marcou un antes e un despois a nivel cultural, social ou empresarial.

Foi executado polo artista urbano ‘Mon Devane’ nunha das paredes do Centro Social da parroquia, que contou coa autorización municipal tras solicitalo a organización. A concelleira de Cultura, presente no acto lembra, ante diferentes preguntas que "se autorizou que o mural se pintase na fachada do Centro Social", á vez que encomiou durante a presentación do Castelo Conta a "maneira excepcional de homenaxear ‘á Martela’, como se lle coñecía, coa súa familia e cunha obra que será xa para sempre parte do patrimonio cullerdense”, afirmou.

O Concello de Culleredo aposta polo modelo sostible e cultural do Castelo Conta cunha achega de 56.000 euros. A Administración local contratou a parte dos artistas, loxística e actividades de ámbito medio ambiental nunha idea que espera consolidar co tempo, coa colaboración dos promotores desta idea, que comanda o humorista Xosé Touriñán.

“Confiamos e poñemos en valor a relevancia do Castelo Conta á hora de sustentar a maneira de difusión cultural e medio ambiental ás novas xeracións”, afirma o alcalde, quen sinala que “pasarse por Castelo durante esta semana é ver que unha maneira de divertirse e ser respectuoso coa contorna é posible”.

Así, o Concello sufragou o gasto que supoñen os talleres de autocultivo, refuxios para insectos, plantacións simbólicas de especies autóctonas e a camiñada divulgativa sobre a flora autóctona do monte galego. Ademais, tamén se fixo cargo das actuacións de Guadi Galego, Xabier Díaz, Galifunk Brass, Carlos Blanco e Luís Davila ou os equipos de son e iluminación, ademais do equipo loxístico, ambulancia para a andaina do sábado, Protección Civil ou valos de seguridade.

José Ramón Rioboo, alcalde de Culleredo, amósase “moi orgulloso do equipo de organización, por dar vida a un evento que xa cumpre a sétima edición e que tivo que esperar dous anos a celebrarse pola pandemia, pero que volve ao grande”, asegura o rexedor, quen manifestou o “total compromiso do goberno local con Castelo e unha programación tan completa para pequenos e maiores”.