O coñecido actor e pallaso Pepe Viyuela impartirá un curso presencial de clown en Culleredo os días 13, 14 e 15 de setembro. Será no Edificio de Servizos Múltiples en horario de 16:00 a 20:00 horas a primeira xornada, de 10:00 a 14:00 e de 16:00 a 20:00 horas a segunda e de 10:00 a 14:00 horas a última.

 

O seu obxectivo principal é ofrecer pautas que axuden a crear o camiño para construír o mapa que ten que percorrer cada persoa e crear así “o seu propio pallaso”, aquel que está nalgún lugar, a quen hai que buscar, inventar, crear, facelo brotar aos poucos gozando do pracer de fracasar. 

 

Usaranse a acción, a improvisación e o adestramento. Aprenderase a fuxir do sufrimento e a reaprender a xogar, porque o pracer é o motor e a única chave que dá acceso a este universo ilóxico e absurdo onde absolutamente todo é posible. Están dispoñibles 15 prazas, requírese un mínimo de 10 persoas para poder levalo a cabo e recoméndase roupa, calzado cómodo e un nariz vermello pequena con goma elástica. 

 

Pepe Viyuela, Logroño (1963) estudou Filosofía e tamén arte dramática. Comeza a ser coñecido no mundo do espectáculo como un pallaso tenro, inocente e torpe copn unha voz e maneira de falar peculiares. A súa primeira aparición televisiva foi no programa “Un, dous tres… responda outra vez” como humorista, onde preguntaba a famosa frase “Pero, isto que é?” e polo número no que se vía atrapado nunha cadeira pregable. Especialmente coñecido pola súa faceta de actor na serie de televisión “Aída”, Pepe é un actor todo terreo. Participou en películas como “O milagre de P Tinto” (1998); “A gran aventura de Mortadelo e Filemón” (2003); ou como protagonista na obra de teatro “O pisito” xunto a Teté Delgado e Asunción Balaguer, entre 2009 e 2011.