O alumnado da compañía de teatro El Ruiseñor, que dirixe Susana Crespo, executou a pasada semana Scrooge, de Charles Dickens, baixo o mando da propia fundadora, no Auditorio Gustav Mahler do Conservatorio Municipal de Música. Supuxo a volta aos escenarios no municipio da compañía.

 

A compañía, con sede en Culleredo, conta na actualidade con máis de 500 alumnos e un persoal de 7 profesoras e profesores, no regreso aos escenarios dun proxecto que naceu no ano 2006 no Burgo da man da propia Susana e Fernando Moares. Por alí pasaron profesionais da talla de Paula Pier ou Judith Fernández.

 

Así, 33 actores e actrices da escola, de múltiples idades, esgotaron as entradas para encher un teatro ao que, por fin, acudiron “sen butacas encintadas e que devolve a esperanza e a alegría”, comentaba Susana, quen quixo agradecer “a todo o equipo de montaxe, salón de peiteado e maquillaxe de El Ruiseñor” que fixesen posible a volta ao escenario “dunha repartición de múltiples tamaños do que me sinto moi pero que moi orgullosa. Tiñamos ganas de volver”, sentenciou.

 

A concelleira de Cultura, Penélope López, presente na representación, destacou “o amor e respecto que todas as persoas que integran El Ruiseñor teñen por e para o teatro”, palabras ás que se quixo sumar o alcalde,  José Ramón Rioboo, agradecendo “a implicación de Susana Crespo neste proxecto, que conta máis de tres lustros de vida” e animando á xente para “formar parte dun precioso proxecto”.