• O prazo de inscrición abrirase o vindeiro luns no Burgo.

O Concello de Culleredo lanza unha nova edición dos seus campamentos urbanos de primavera, unha alternativa de lecer educativo para os días non lectivos da próxima Semana Santa.
 
Celebraranse no CEIP Vila de Rutis. Terán lugar desde o 11 ao 18 de abril, excepto os días festivos e o sábado. Diríxense a nenos de 3 a 12 anos de idade, tendo preferencia os empadroados no municipio de Culleredo.
 
As actividades desenvolveranse en horario de 9.00 a 14.00 horas. Haberá posibilidade de servizo de comida e almorzo.
 
O programa de actividades estará guiado nesta ocasión pola temática do coidado do medio ambiente, baixo a denominación de "Crea e recrea". Incluirá actividades de educación ambiental e promoción de hábitos saudables, como talleres, xogos, e dinámicas no exterior.
 
O prazo de inscrición comprenderá desde este luns 28 de marzo ao venres 1 de abril no Edificio de Servizos Múltiples do Burgo. Para proporcionar a máxima información ás familias participantes, haberá unha reunión informativa o 7 de abril ás 20.00 horas en Servizos Múltiples. Tamén se habilitará un blogue durante a actividade onde se colgará a programación diaria.

A concelleira de Educación, Jéssica Méndez, explica que desde o Concello retómanse estas iniciativas por ser “unha opción esencial para a conciliación” para as familias. Destaca que as actividades se enmarcan no apartado do lecer educativo.