O Concello de Culleredo prepara a renovación da rúa Laxe, concretamente dos viais VP-23 e VP-29, cuxo proxecto está en fase de licitación e por un valor de 241.451,56 euros. As principais liñas de traballo deste proxecto céntranse nos aspectos de modernización de pavimentos, execución de labores de conservación e mantemento, mellora da drenaxe, reposición dos servizos afectados polas obras e renovación da sinalización.

Intervirase na totalidade de lonxitude da vía, que ten 1730 metros de longo e 6,5 metros de ancho. Previamente, están contemplados traballos de limpeza de bordos e varrido do firme existente nesta vía, así como o fresado do pavimento actual nas ligazóns con outras rúas adxacentes.

O concelleiro de Obras, Carlos Liñares, sinala a “notable intervención que se levará a cabo nestes dous viais”, e que o goberno local “decidiu executar en base ás peticións das veciñas e veciños da zona, escoitando as súas demandas”.