A praza de Europa do Burgo será mañá, martes 17 de maio, o núcleo da celebración do Día dás Letras Galegas en Culleredo. O Concello organiza a Feira de Artesanía cun amplo programa de actos, que reunirá ao longo do día a veciños de todas as idades.
A Feira de Artesanía estará aberta desde as 12.00 até as 20.00 horas cuns 40 artesáns procedentes de diferentes localidades. Nos distintos postos ofrecerán as súas creacións de diversas artes e modalidades.
A feira estará acompañada dun programa de actividades para dinamizar a xornada. Ás 12.30 horas poderase escoitar a música galega de dous dos grupos folclóricos máis consolidados: Catalmibre e Ancoradoira.
Os nenos serán os principais destinatarios de actividades como os talleres infantís, que se prevén de 12.00 a 14.00 horas e de 16.00 a 20.00.
Pola tarde, a compañía O Circo de Piter ofrecerá obradoiros circenses, de 16.30 a 19.30 horas. E a esa hora terá lugar a actuación do mago Dani con "Don Gelati".