O Concello de Culleredo quere modernizar o sistema actual de transporte público no municipio. O goberno municipal cullerdense baralla un sistema, en combinación coas liñas tradicionais, que configure os traxectos segundo a demanda real dos veciños, propiciando mellores frecuencias para eles. O obxectivo sería adaptar o paso do bus tendo en conta as peticións formuladas con anterioridade.

O sistema ofrecería aos veciños diferentes formas de adiantar as súas demandas, sendo unha aplicación por internet unha delas. Neste sistema baixo demanda, o Concello tamén pensa en implicar aos taxistas, mediante un convenio a acordar, para ofrecer aos veciños máis posibilidades.

Esta idea foi incluída polo Concello na estratexia de desenvolvemento urbano aprobada polo pleno e elevada á Unión Europea. Enmárcase no obxectivo de fomentar a mobilidade de forma sustentable co medio ambiente.

Este sistema permitiría centrar os esforzos en cubrir o que verdadeiramente piden os usuarios. Con el poderíase un día determinado aumentar os servizos a un determinado núcleo ou evitar pasos innecesarios por outros, minimizando o tempo do traxecto. En definitiva, ofrecer un servizo de maior calidade para o usuario.

Melloras en paradas

Este sistema non é a única acción encamiñada a mellorar o transporte público e introducir a eficiencia que contempla o plan europeo do Concello. Haberá tamén traballos de mellora das paradas e a instalación de aparcadoiros de bicicletas cubertos nalgunha delas, para propiciar así o uso combinado da bici desde a vivenda ata a parada e desde aí o transporte colectivo.

Así mesmo inclúese a disposición de paneis informativos en paradas, listos para ofrecer datos sobre o transporte pero tamén sobre información municipal de interese.

En total esta liña de actuación do plan ten un orzamento de 250.500 euros. A proposta xa foi elevada polo Concello ao Estado para que a UE poida valorala, xunto coas restante recibidas, e facer a súa resolución.