Culleredo prepárase para a súa tradicional exaltación da castaña. O Magosto Municipal, que organiza o Concello, terá lugar este sábado 8 de novembro no parque de Celas, desde as 18.00 horas, e prevese a degustación de máis de 500 quilos de castañas por un milleiro de persoas.

A vertente gastronómica será a principal en Celas. Os asistentes poderán probar castañas asadas, touciño á brasa, e viño, acabando coa tradicional queimada. O prezo por persoa será de 2 euros. Tampouco faltará a música para pasar a tarde. A festa estará amenizada polo Dúo Compás.

O parque de Celas conta ademais coa pista cuberta, polo que en caso de inclemencias meteorolóxicas os asistentes poderán protexerse.

O Magosto Municipal de Culleredo é o máis concorrido da comarca. O goberno local buscou a data máis próxima ao comezo de novembro, por antonomasia a propia do magosto, para levar a cabo esta celebración e así manter unha tradición galega con moito arraigamento en Culleredo.

O Magosto conta coa colaboración da Sociedade Cultural e Deportiva O Cruceiro de Celas.