O goberno de Culleredo, a través da Concellaría de Sanidade, aposta polo traballo conxunto con asociacións do municipio para promover programas para a educación para a saúde. Nese sentido enmárcase a colaboración que se desenvolve coa entidade cullerdense Alma (Apoio á lactación materna), que impulsa a crianza saudable.

Con este obxectivo, o Concello e Alma organizan a proxección do documental sobre crianza "A educación prohibida". A actividade quere fomentar unha educación en saúde desde os primeiros meses e anos de vida dos menores.

"A educación prohibida" está considerada como a primeira película en español estreada financiada integramente mediante o modelo de crowdfunding. O documental divídese en 10 episodios temáticos que abordan diversos aspectos das prácticas educativas para crecer con saúde e nun contexto saudable.

A proxección terá lugar o 31 de maio ás 18.00 horas no Pazo de Vila Melania. É aberta ao público e gratuíta.