ES / GL

Culleredo celebrará o Día da Muller Rural cunha ampla programación con música, artesanía, foliadas e gastronomía

29 Septiembre, 2025. 13:49

Cultura

O Concello de Culleredo conmemorará sábado 11 de outubro o Día da Muller Rural cunha ampla xornada de actividades no recinto cuberto do parque da Torre de Celas. A cita, organizada polo Concello en colaboración coa Asociación As Berenguelas, busca poñer en valor o papel esencial que desempeñan as mulleres no ámbito rural.

A programación arrincará ás 13:00 horas coa presentación da Feira de Mulleres do Rural, a cargo da corporación municipal. Posteriormente, ás 13:30 horas, a cantante Sheila Patricia ofrecerá un concerto acompañado dun faladoiro.

A comida, organizada pola Asociación As Berenguelas, celebrarase ás 14:30 horas. O menú incluirá paella (mixta ou vegana), empanadilla, torta de Santiago, pan, viño e auga, cun prezo de 13 euros por persoa. As reservas poderán realizarse ata o 6 de outubro a través do teléfono 622 347 788.

Xa pola tarde, os actos continuarán cos cantos populares de sobremesa a cargo do Coro do Conservatorio ás 16:00 horas, seguidos pola actuación do grupo Xacarandaina, programada ás 17:00 horas.

A partir das 18:00 horas comezará a foliada libre, na que participarán os grupos tradicionais locais Ancoradoira, Silvatuxeiras, Xilbardas, Larpeiros de Altamira e Son da Terriña.

Durante toda a xornada estará en marcha a Feira de Artesanía e do Produto Ecolóxico, con diferentes postos de artesás e artesáns de Galicia.