ES / GL

O Concello estrea as curtas elaboradas por 50 alumnos do Blanco Amor na terceira edición do "Culleredo, de cine"

23 Junio, 2025. 12:02

Educación

O Concello de Culleredo conclúe a terceira edición do seu programa “Culleredo, de cine” coa estrea das tres curtametraxes elaboradas polos máis de 50 mozos participantes. O IES Blanco Amor foi escenario o venres, 20 de xuño, da proxección da obra dos seus alumnos de 4º de ESO, no marco da gradación que celebraron no centro.

A curta, titulada “Dulce regreso”, suscitou unha gran ovación entre as decenas de compañeiros que a presenciaron como espectadores. As outras dúas obras son de 1º de Bacharelato e levan por nome “Encerrador” e “El rastro del retraso”. Todas están dispoñibles na canle de Youtube do Concello de Culleredo.

A primeira tenente de alcalde e edil de Xuventude, Cristina Pardo, e a concelleira de Cultura, Penélope López, entregaron no acto os diplomas aos rapaces que participaron no programa.

Ao IES tamén acudiu o director Hugh McGinley, responsable de impartir a formación da iniciativa e de guiar aos mozos para realizar a curta. O director levouse un sonoro aplauso e un recoñecemento por parte da dirección do IES, que lle entregou a medalla do centro pola súa implicación.

Mediante un traballo en grupo, os rapaces formáronse e involucráronse en todas as fases da elaboración das pezas audiovisuais. A actividade foi impartida en varias fases, con tutela durante todo o proceso.