O Paseo da Río do Burgo do Concello de Culleredo acollerá o 27º Maratón Autonómico Urbano da asociación Special Olympics Galicia, unhas xornadas competitivas e solidarias para persoas con discapacidade intelectual. A cita terá lugar o domingo 15 de xuño e contará con participantes chegados de toda Galicia. Conta coa colaboración do Concello e FAEMGA Galicia e está promovida pola Asociación Aspronaga.

 

O maratón inclúe distintas distancias adaptadas a todos os participantes co obxectivo de fomentar a integración social e a práctica deportiva entre as persoas con discapacidade intelectual. En total haberá catro categorías diferentes; 3.000 metros, 1.500 metros, 800 metros e 300 metros.

 

Os horarios aínda son provisionais, pero espérase que a proba de inicio a iso das 10:45 horas, cando se realizará un acto de inauguración. Posteriormente, empezarán a competir as diferentes categorías, sendo a primeira a dos 3.000 metros, ás 12:00 horas. Quince minutos despois, ás 12:15, farano os participantes nos 300 metros, ás 12:45 horas será a quenda dos 800 metros e ás 13:30 horas será a quenda dos participantes nos 1.500 metros. O acto de clausura da competición está previsto ás 14:20 horas, pero o evento non finalizará aí, cunha comida ás 15:00 horas e varias actividades programadas en horario de tarde.

 

O Concello de Culleredo axudará na organización do evento e en varios aspectos que foron coordinados na reunión mantida esta semana entre o alcalde de Culleredo, José Ramón Rioboo, a tenente de alcalde e concelleira de Deportes, Cristina Pardo, o presidente de Special Olympics Galicia, Eladio Fernández, o representante da Asociación Aspronaga, Antonio Naya, e a directora técnica de Special Olympics, Eunice Mosquera. Neste encontro pecháronse os últimos detalles do evento, coordinando a organización, os agasallos conmemorativos e outros aspectos fundamentais para o desenvolvemento da xornada.