O Concello de Culleredo pon en marcha, un ano máis, o programa de conciliación ‘Mañás de Campamento’, unha iniciativa que facilita a conciliación ás familias durante o verán. O prazo para solicitar praza neste campamento abre o mércores 23 de abril e deberá facerse a través dun formulario en liña a partir das 9:00 horas. A iniciativa está dirixida a nenas e nenos de entre 3 e 12 anos matriculados en Educación Infantil ou Primaria nalgún dos centros de Culleredo.

 

‘Mañás de Campamento’ poñerase en marcha o 23 de xuño e terminará o 29 de agosto, ofrecendo ás familias quendas de 2, 3, 4 e 5 semanas e en diferentes datas para adaptarse dunha mellor forma ás súas necesidades. Os espazos nos que se celebrarán os campamentos urbanos serán o CEIP Vila de Rutis, CEIP Sofía Casanova e CEIP Isaac Díaz Pardo, en función da idade dos participantes e do formato escollido por cada familia.

 

Ofrécese, ademais do horario de actividades, que comprende de 9:00 a 14:00 horas, un servizo de almorzo desde as 7:30 horas e tamén de xantar, permitindo aos pequenos e pequenas permanecer nos centros ata as 16:00 horas.

 

As actividades están deseñadas para gozar dos xogos ao aire libre, sempre que a climatoloxía acompañe, fomentar a convivencia e animar á interrelación entre as nenas e nenos. Estarán adaptadas ás diferentes idades, cun enfoque activo e participativo. A ciencia, a historia, a música, as artes plásticas e a natureza serán temáticas que se abordarán nos diferentes talleres.

 

As persoas interesadas en apuntarse ou en recibir máis información poden consultar os requisitos na web municipal. 

 

O prazo permanecerá aberto ata o venres 2 de maio. O mércores 7 de maio darase a coñecer a lista provisional de admitidos; o prazo de reclamacións abrirase ese mesmo día e pechará o 12 de maio, para que o sorteo realícese o día 15 e a lista definitiva déase a coñecer o 20 de maio. O prazo de matrícula abrirá ese mesmo día e permanecerá aberto ata o 2 de xuño. Por último, haberá un prazo extraordinario de matrícula os días 9 e 10 de xuño.