O alumnado dos institutos de Culleredo participa estes días na iniciativa ‘Teatralízache: Alta Costura’, unha proposta que forma parte do programa municipal EducaCulleredo e que achega o teatro á mocidade do municipio.

 

Nesta iniciativa, que deu comezo o pasado mércores, 3 de abril, o alumnado do IES Rego de Trabe, do IES Blanco Amor e do Centro A Escada poderá visionar a obra ‘Alta Costura’, da compañía Elefante Elegante, e participar posteriormente nun espazo de debate sobre a moda actual e os modelos de consumo, buscando a reflexión dos mozos. 

 

Nos próximos días, e ata o xoves 10 de abril, irán participando os alumnos desde 3º da ESO ata Bacharelato, sendo os primeiros en asistir os primeiros cursos do IES Rego de Trabe.

 

‘Alta Costura’ é un espectáculo cómico, irónico e poético sobre a moda e a súa estreita relación co consumo, o recoñecemento social, a contaminación ou as condicións laborais. O espectáculo detense detalladamente na moda coñecida como ‘fast-fashion’ e na filosofía de mercado empregada polas marcas, profundando na rapidez coa que os produtos son desvalorizados, caen en desuso e transfórmanse en lixo.