O Concello de Culleredo acollerá nos meses de febreiro e marzo varios obradoiros, charlas, actividades e unha performance dentro do proxecto teatral 'Punto en Boca', con propostas que se desenvolverán en distintos puntos do municipio.

 

En total, organizaranse 10 actividades previas á estrea do espectáculo teatral do mesmo nome, que está prevista para o próximo mes de xuño e co que Raquel G. Crespo, responsable do proxecto, quere achegar os oficios e traballos relacionados co mundo da costura á cidadanía a través do teatro.

 

Desta maneira, celebraranse actividades como talleres de iniciación á costura, dinámicas comunitarias, charlas con profesionais do sector ou unha performance final, todas elas completamente gratuítas. Será preciso realizar unha inscrición previa a través do correo electrónico info@puntoenboca.es. 

 

Esta iniciativa está coproducida polo Centro Dramático Galego e por Agadic e conta coa colaboración do Concello de Culleredo e da compañía teatral El Ruiseñor. A proposta foi distinguida o pasado 2024 pola Deputación da Coruña a través dos premios Luísa Villalta para proxectos pola igualdade.

 

 

Así, e antes da estrea da obra o próximo mes de xuño, organizaranse 10 actividades diferentes durante os meses de febreiro e marzo en diferentes puntos do concello. A programación comezou o pasado luns, 3 de febreiro, co taller de teatro ‘Creación personaxe a través de roupa’, celebrado no Xardín Botánico do Burgo da man da compañía El Ruiseñor.

 

A seguinte actividade está programada para este sábado 8 de febreiro ás 20:00 horas, cando se realizará a presentación do proxecto ‘Punto en Boca’ e haberá unha instalación artística no Xardín Botánico do Burgo. Esta actividade conta con entrada libre.

 

O martes 11 de febreiro organizarase o taller ‘Primeiros pasos, Patrón Saia Base’ no Edificio de Servizos Múltiples do Burgo ás 10:00 horas, contando con 15 prazas dispoñibles. O xoves 13 de febreiro será a quenda do taller e dinámica comunitaria ‘Costura colaborativa: unha peza para a comunidade’, que non conta con límite de prazas e será no Xardín Botánico do Burgo ás 18:30 horas.

 

A seguinte semana haberá varias actividades, empezando o martes 18 co taller ‘Primeiros pasos, Patrón Corpo Base’ ás 18:30 horas no Edificio de Servizos Múltiples, con 15 prazas dispoñibles. Posteriormente, o xoves 20 celebrarase a charla ‘Costura, amor e familia’, programada a partir das 20:00 horas no Xardín Botánico do Burgo con 40 prazas dispoñibles. Xa o sábado 22 a partir das 11:00 horas organizarase a charla ‘Nunca é bo momento, así que… Imos aló!’ e un taller de bordado, ambas as no Xardín Botánico con 40 prazas.

 

As tres últimas actividades celebraranse a última semana do mes, cunha dobre sesión o xoves 27 de febreiro. Primeiro será a quenda do taller de teatro ‘Creación personaxe a través de roupa’, con 20 prazas dispoñibles e que se organizará entre as 18:00 e as 19:30 horas no Xardín Botánico. Nesa mesma localización e xusto despois, entre as 19:30 e as 21:00 horas, terá lugar o taller de teatro ‘Creación escénica a través da costura’, con outras 20 prazas.

 

E para pechar a programación de ‘Punto en Boca’, o sábado 1 de marzo ás 19:00 horas celebrarase a charla ‘Teatro e indumentaria’ e realizarase unha performance do proxecto. Esta última actividade será no Pazo de Vila Melania con 40 prazas dispoñibles.