O Concello de Culleredo retoma un dos seus programas para nenas e nenos do municipio que máis éxito tivo nos últimos anos: o Cullerchef, un taller de cociña saudable para menores de 6 a 12 anos.

As inscricións poderán formalizarse ata o xoves 4 de abril ás 14:00 horas a través deste formulario web.

Haberá dispoñibles 30 prazas e a actividade celebrarase no Edificio de Servizos Múltiples do Burgo todos os martes desde o 9 de abril ao 18 de xuño. Haberá dous grupos, de 15 persoas cada un, e os horarios serán de 17:00 a 18:30 horas para o primeiro, e de 19:00 a 20:30 horas para o segundo. As prazas cubriranse por orde de inscrición e con preferencia para as empadroadas e empadroados no Concello de Culleredo.

O Cullerchef naceu no ano 2018 cun obxectivo claro: achegarlles ferramentas aos máis pequenos e pequenas para aprender a cociñar dunha maneira sa, axudándolles a diferenciar que produtos son os de mellor achega nutricional, á vez que se divirten elaborando as súas creacións.