O Concello de Culleredo celebrará o vindeiro sábado 27 de outubro a tradicional festa do Magosto Municipal. Terá lugar no parque recreativo de Celas, a partires das 6 da tarde.

A vertente gastronómica será a principal en Celas. Os asistentes poderán degustar castañas asadas, touciño á brasa, viño novo e queimada. O prezo por persoa será de 2 euros. Tampouco faltará a música para pasar a tarde. A festa estará amenizada polo Dúo Compás.

O goberno local anima aos veciños de todas as parroquias a achegarse ata o parque de Celas para pasa un día en familia e aproveitar para manter un encontro con veciños doutras parroquias. A xulgar polos resultados dos últimos anos, serán ducias as persoas que participen desta tradicional festa galega.

O Magosto conta coa colaboración da Sociedade Cultural e Deportiva “O Cruceiro” de Celas.