ES / GL

Conclúen os campamentos urbanos coa participación de 400 nenos

5 Septembro, 2016. 19:22

Educación

O Concello de Culleredo deu por concluída a súa campaña de campamentos urbanos para a conciliación, que cumpriu este verán a súa edición XVII. Case 400 nenos e nenas participaron na iniciativa, deseñada para ofrecer unha alternativa de lecer educativo aos pequenos na época estival.

A concelleira de Educación, Carmen Varela, desprazouse o último días ata os campamentos para a clausura. O Concello ampliou este ano as súas prazas para estes campamentos urbanos co obxectivo de que accedesen a eles todos os empadroados que o solicitaron. "A actividade suscita cada ano un gran interese entre as familias por iso facemos un maior esforzo", apunta a concelleira.

Os campamentos desenvolvéronse, para idade infantil, no CEIP Isaac Díaz Pardo, e para primaria no CEIP Sofía Casanova. A oferta municipal dirixiuse a nenos de entre 3 e 12 anos, con campamentos de distinta duración. Así, houbo dúas quendas de cinco semanas, dúas de tres, e dúas quendas de dúas semanas, desde o inicio das vacacións, abarcando o máximo de período non lectivo.

Os campamentos urbanos inclúen actividades lúdicas e pedagóxicas cuxo obxectivo é fomentar a convivencia a través de xogos, talleres, excursións e dinámicas grupales, nos valores de cooperación, respecto, igualdade, corresponsabilidade, tolerancia e apoio mutuo son a tónica predominante.