O Concello de Culleredo recibiu a visita institucional do novo brigada xefe da área de Prevención de Delincuencia do posto da Garda Civil de Culleredo, Jorge Longueira. O alcalde en funcións, José Ramón Riobóo, acompañado do xefe da Policía Local de Culleredo, Ricardo Dovigo, recibiu ao brigada xefe, que acudiu xunto co tenente do posto de Culleredo, Antonio Táboas.

Longueira incorpórase ao posto cullerdense tras o seu paso polo de Carral, asumindo a dirección desta importante área.

O alcalde en funcións expresou os mellores desexos para Longueira na súa nova andaina, para o que axudará, destacou, que é un perfecto coñecedor da comarca. Riobóo agradeceu o gran traballo que desenvolve a Garda Civil en Culleredo para garantir a seguridade cidadá, en coordinación coa Policía Local.

O rexedor aproveitou o acto institucional para mostrarlle a Longueira as instalacións da Casa do Concello e presentarlle aos funcionarios.