O alcalde de Culleredo, Julio Sacristán, e o primeiro tenente de alcalde e responsable da área de Seguridade Cidadá, José Ramón Rioboo, mantiveron unha reunión co tenente do posto da Garda Civil de Culleredo, Antonio Táboas, acompañados polo alférez, e o xefe da Policía Local de Culleredo.

A reunión serviu como toma de contacto do novo edil de Seguridade Cidadá e para reforzar a colaboración entre ambas as institucións. O goberno de Culleredo quere manter esta relación fluída a efectos de garantir a seguridade dos seus cidadáns e potenciar o traballo coordinado entre todas as forzas de seguridade do municipio.

O encontro propiciou facer un repaso dos temas máis importantes en materia de seguridade no municipio e comprobar que o índice de delincuencia non se incrementou en xeral, a pesar da actuación ocasional de bandas organizadas. Púidose comprobar tamén o alto índice de esclarecementos dos delitos.

O goberno de Culleredo, considera fundamental, tanto para a prevención, como para o esclarecemento dos delitos a colaboración veciñal e a colaboración e coordinación dos Corpos e Forzas de Seguridade. Para iso celebraranse reunións semanais entre os responsables da Garda Civil e da Policía Local que servirán para reforzar a colaboración.

O Concello, a Garda Civil e Policía Local mostraron a súa satisfacción polos éxitos alcanzados nas últimas semanas na persecución e prevención dos delitos.