Culleredo viviu esta fin de semana unha auténtica festa do fútbol coa disputa das finais do Trofeo Municipal 2026 no Municipal de Rutis. O Sporting Burgo, o Club Femenino Celas e o Olímpico de Rutis foron os grandes vencedores, á espera da final do trofeo de veteranos, que terá lugar o mércores. Nas entregas de premios participaron o alcalde, José Ramón Rioboo, e a tenente de alcalde e concelleira de Deportes, Cristina Pardo.

No XLVII Trofeo de Fútbol Afeccionado, o Sporting Burgo proclamouse campión tras impoñerse ao Olímpico de Rutis nuhna vibrante final.

O fútbol feminino tamén coroou ás súas vencedoras coa oitava edición do seu torneo, resolto nun triangular no que o Club Femenino Celas se fixo co primeiro posto por diante do Sporting Burgo e da AD Culleredo.

O fútbol base completou a xornada coas finais do XII Trofeo, que enfrontou na loita polo título ao Olímpico de Rutis A e ao Olímpico de Rutis B, mentres que o Almeiras A e o Almeiras B se mediron no partido polo terceiro e cuarto posto.

O torneo aínda garda un último capítulo: a final do XXVII Trofeo de Fútbol Veterano, que enfrontará ao Olímpico de Rutis e ao SPM Veteranos este mércores 2 de setembro ás 20:30 horas, tamén no Municipal de Rutis.