O Concello de Culleredo abre unha nova exposición na aula de Natureza do Xardín Botánico do Burgo. Nesta ocasión, a mostra exhibirá as fotografías dunha veciña do municipio, que relata con elas as súas vivencias no poboado xitano de O Carqueixo, en Lugo.

Rosa María Pérez, residente no Burgo, presenta "Miradas", unha exposición que  aproxima o fotoperiodismo e a reportaxe social, especialmente a través dos retratos dos pequenos da comunidade xitana.

Polo seu traballo como educadora infantil puido achegarse a eles e ás súas familias. Coa exposición, quere reflectir o modo de vida desa comunidade, centrándose nos máis pequenos (os seus soños, desexos, o  día a día),  sen deixar pasar por alto o contorna que os rodea.

A exposición será inaugurada polo Concello o venres, 8 de agosto, ás 20.30 horas. Desde esa data quedará aberta até o 6 de setembro no seguinte horario:

• De luns a venres, de 18:00 a 21:00
• Sábados, de 11:00 a 13:30 e de 18:00 a 21:00.

Curriculum

Rosa María Pérez Martínez formouse como técnico especialista en Xardín de Infancia, profesión na que traballa na actualidade.

Realizou tamén o Ciclo Superior de Fotografía Artística  na Escola de Arte Superior e Deseño "Ramón Falcón" de Lugo (2008-2010), realizando as prácticas no xornal El Progreso, de Lugo.

Realizou exposicións fotográficas no edificio Multiusos Xunta de Galicia, en Lugo (2005), ou no Concello de Oroso (2006).

No ano 2004 obtivo o 3º premio de fotografía de Nadal Ágora Lugo, e no ano 2010,  o 1º premio de fotografía Acertos e Desastres Arquitectónicos COAG (2010).