ES / GL

Concienciación contra a complicidade con comportamentos de acoso escolar

4 Mayo, 2017. 18:37

Educación

En coincidencia co Día Internacional contra o Acoso Escolar, o Concello de Culleredo completou a súa campaña educativa emprendida para previr o bullying entre os escolares. Desenvolveuse nas aulas de 5º de primaria de todos os colexios públicos do municipio, baixo a denominación de "Eu non son cómplice".

A iniciativa foi desenvolvida pola Comisión Municipal de Absentismo Escolar, un órgano que o Concello ten para abordar desde un punto de vista técnico o fracaso escolar ou o acoso. Está formada pola psicóloga municipal, unha pedagoga e un representante da Policía Local.

A campaña consistiu no desenvolvemento de talleres nas aulas. Mediante dinámicas construtivistas de reflexión, participación e toma de conciencia, traballáronse aspectos como a empatía, a comunicación, así como e estratexias para porlle fronte ás persoas acosadoras desde un posicionamento tanto individual como colectivo de non complicidade con este tipo de comportamento.

O Concello de Culleredo quere facer un chamamento á toma de conciencia das familias e, en xeral, de toda a comunidade educativa para tentar corrixir modelos de conduta que poidan derivar en acoso escolar.

A Comisión Técnica destacou nas sesións a importancia de comunicarse e pedir axuda aos docentes ou ao persoal técnico municipal ante calquera indicio ou sospeita de que un menor estea a padecer calquera tipo de acoso escolar ou bullying.