Culleredo acolleu o domingo 23 de febreiro a Ártabra, unha durísjma travesía ciclista de 81 quilómetros, ou 48 no percorrido curto, polos montes da Zapateira, Bregua, Santa Leocadia e Xalo.

O estado dos camiños, saturados de auga e barro, achegou un plus de dureza a unha proba que, no seu percorrido longo, tivo un desnivel acumulado de máis de 3.000 metros.

Deste xeito, con 450 ciclistas inscritos, a edición de 2014 da marcha de bicicleta de montaña do Club Ciclista Riazor, en colaboración co Concello de Culleredo, transcorreu segundo o previsto.

Polo demais, a iniciativa solidaria organizada en colaboración co Fondo Municipal de Alimentos de Culleredo permitiu recadar máis de 200 litros de leite, achegados voluntariamente polos participantes.

Os ciclistas da Ártabra representaron a 51 clubs de catro comunidades autónomas: Galicia, Asturias, Cantabria e Estremadura. A organización mobilizou a 70 voluntarios, a maior parte deles socios do Riazor, ademais de efectivos de Protección Civil e Policía Local dos concellos de Culleredo e Arteixo.

Roberto Rilo, presidente do club, felicitou a todos os participantes e agradeceu o apoio do Concello de Culleredo e dos patrocinadores da Ártabra: Bicicletas Aran, Bici Total, Ciclos Quintena, Coca-Cola, Codan, Decathlon, Fripor, Gadis e Nutrisport.